လက်ရှိ အစိုးရကတော့ E government တည်ဆောက်မယ်ဆိုပြီး ကြွေးကြော်လှုပ်ရှားနေတယ်။
အရင် အစိုးရလက်ထက်တည်းက လည်း ကြွေးကြော်နေတာပါ။
E government ဆောက်မယ်ဆိုပြိး တစ်ခေါက်အော် တိုင်း Website တွေတစ်ခါပြောင်းသွားတာ။ Web address အသစ်တွေ ပေါ်လာတာသာထူးခြားတယ်။ ကျန်တာတော့ဘာမှ ထူးထူးခြားခြား ပြောင်းလဲမှုမရှိပါ။
အခုပြောချင်တာကတော့ .. E government လုပ်ဖို့ ရှေ့ဆက်တိုးရာမှာ အခက်အခဲဖြစ်နေတဲ့အပိုင်းတွေအကြောင်းပါ။
ကျွန်တော် က အစိုးရဝန်ထမ်းလည်းမဟုတ်ဘူး။ အပြင် ကုမ္ပဏီလုပ်ငန်းလုပ်နေသူလည်းမဟုတ်ဘူး။
ဒါပေမယ့် အစိုးရ နဲ့ဆက်နွယ်တဲ့အဖွဲ့အစည်းတွေ နဲ့ပတ်သက်ပြီး Website ကူတည်ဆောက်ပေးဖူးတာရှိတယ်။ လုပ်ငန်းလည်ပတ်ရာမှာ ဖြစ်နေတဲ့ပြဿနာတွေကိုမြင်ခဲ့ဖူးတယ်။
ဝန်ကြီးဌာန အဆင့်၊ ဗဟို အဆင့်ဌာနတွေမှာတောင် နည်းပညာဌာနမရှိလို့ ရုံးတွင်းက ကွန်ပျူတာ ပြဿနာ ၊ နည်းပညာပြဿနာမှန်သမျှ ကြုံသလိုဖြေရှင်းနေကြတာကိုလည်းမြင်ခဲ့ဖူးတယ်။
အိုင်တီဌာန ကို ဖွဲ့စည်းဖို့ အတွက် လူအရင်းအမြစ်မရှိဘူးလား။ ကျွမ်းကျင်သူမရှိဘူးလား။
အခုလို ရုံးတွင်းနည်းပညာနဲ့ပတ်သက်တဲ့အလုပ်တွေလည်ပတ်ဖို့ တောင် အဆင်မပြေမှတော့ Website တွေ ၊ဒီထက်အဆင့်မြင့်အသုံးချလာမယ့်နည်းပညာတွေ၊ Data center စတာတွေ ၊လုံခြုံရေးပိုင်း ကိစ္စတွေ ။ ဒါတွေကို ဘယ်လို ဖြေရှင်းကြတော့မလဲ။
လတ်တလော အခြေအနေမှာ အစိုးရ ဌာနတွေ၊ တက္ကသိုလ်တွေအားလုံးနီးပါးရဲ့ website တွေကို ပြင်ပပုဂ္ဂလိက ကုမ္ပဏီတွေက နေတာဝန်ယူ တည်ဆောက်ပေးထားတယ်။
အစိုးရက နေ Standard CMS ချထားတာလည်းမရှိတော့ ကုမ္ပဏီကပြောတဲ့ အတိုင်းသာ လုပ်ဖြစ်နေတာမျိုးများတယ်။ နောက် ပြီးတော့ Website ကို ကိုင်တွယ်ခွင့်တွေကလည်း လူကြီးတွေကိုပေးထားတယ် ။ အဲဒီလူကြီးတွေကလည်း ဒီအတွက် လေ့လာဖို့အချိန်မပေးနိုင်ဘူး။
ဒါကြောင့် မို့ Website တွေက လှုပ်ရှားသက်ဝင်မှုမရှိပဲသေနေတယ်။
သူတို့ရဲ့အောက်မှာရှိတဲ့ ဝန်ထမ်းငယ်တွေကျတော့လည်း အခုအချိန်ထိ website ကိုင်တွယ်ရမှာကို သရဲသဘက်လို ကြောက်နေကြတယ်။စိမ်းနေတယ်။
ပုဂ္ဂလိက ကုမ္ပဏီတွေက လည်း post တင်တာလောက် ကိုတောင် သေသေချာချာ မသင်ပေးခဲ့တဲ့အတွက် သူတို့ဆီမှာ ဘယ်လိုဟာဖြစ်သင့်သလဲ ဘယ်လို ရေးသင့် သလဲမသိကြဘူး။
စာမျက်နှာတွေကိုပြင်ဆင်ဖို့ အတွက် ဘာညာဆိုလည်း တစ်ချိန်လုံး ကုမ္ပဏီကို အားကိုးနေရဖို့များတယ်။
ဒီလိုအားကိုးရတဲ့အတွက်ကြောင့် လုံခြုံရေးပိုင်းဆိုင်ရာ မှာ ပြဿနာတွေလည်းရှိနိုင်တယ်။
အခု အချိန်မှာ ဒေတာတွေ နဲ့သိပ်အလုပ်မလုပ်ရသေးပေမယ့် တကယ် E government လုပ်ချင်ပြီဆိုရင်
အချက်အလက်အားလုံးက အင်တာနက်ကတဆင့် သွားမှာဖြစ်တဲ့အတွက် ကြားမှာ ဖြတ်ယူ ပြီးပြောင်းလဲ လို့ရတဲ့ နည်းပညာတွေကလည်း ရှိနိုင်တာကို။
နောက်တစ်ခုကတော့ အကြောင်းအမျိူးမျိုးကြောင့် ပျက်စီး ပျောက်ဆုံးသွားနိုင်တာလည်းရှိသေးတယ်။
အဲဒါတွေအတွက်က တော့ ပြင်ပကုမ္ပဏီလက်ထဲအပ်ထားတာဟာ ကိုယ့်အသက်ကို သူများလက်ထဲအပ်ထားသလိုပဲဖြစ်မှာပဲ.။
တကယ်ဆို ဌာနမှာသာ IT department ရှိခဲ့ရင် အဲဒီDepartment ကလူက Website CMS တွေအကြောင်း နားလည်ရမယ်။ page တွေဘာတွေလောက်ကပြင်တတ်ရမယ်။ ဘယ် နားဘာဖြစ်နေလဲသိရမယ်။ တကယ်လို့ website ကိုကိုင်တွယ်ခွင့်တွေမှာ ရာထူးအလိုက် ခွဲခြားထားတာတွေ ရှိရင်လည်း ကိုင်တွယ်တဲ့သူတွေမှာ ပေါ်တဲ့ သာမာန်ပြဿနာတွေကို IT department ကလူကဖြေရှင်းပေးတတ်ရမယ်။
အဲဒီထဲမှာ လတ်တလော တက်နေတဲ့ ယူနီကုတ် ဇော်ဂျီပြဿနာလည်းပါတယ်။
ယူနီကုတ် ကို အရင်တည်းကသုံးနေကြတယ်ဆိုပေမယ့် .. သူကလည်း အဆက်မပြတ် ပြောင်းလဲနေတဲ့ထဲမှာပါတယ်။ သာမာန် ရုံးဝန်ထမ်းတွေကတော့ ကွန်ပျူတာစိတ်ဝင်စားသူမှမဟုတ်ရင် အသစ်ပေါ်လာတဲ့ဖြေရှင်းနည်းတွေ Software တွေအကြောင်းလိုက်နိုင်ဖို့ကမလွယ်ဘူး။ အခုကျတော့ ရုံးတွေမှာ သူတို့ သုံးတတ်တဲ့ software ၊ အဆင်ပြေတဲ့ စနစ် နဲ့ပဲ ရှေ့ဆက်သွားနေတယ်။ ပြောင်းလဲရမှာကြောက်တယ်ဆိုတာထက်
အသုံးပြုနေရင်း ပြဿနာပေါ်လာရင် မဖြေရှင်းတတ်လို့ အလုပ်တွေနှောင့်နှေးမှာစိုးတာလည်းပါတယ်။
အထက်လူကြီးကတော့ ရေဘူးပေါက်တာမလိုချင်ဘူး ။ ရေပါတာပဲလိုချင်တာလေ။
ဒါကလည်း တစ်ချက်ဖြစ်လိမ့်မယ်လို ထင်တယ်။
လက်တလောမှာ E government နဲ့ပတ်သက် တဲ့ပွဲတွေလည်း မတတ်ရဘူး။ ဘာတွေဖြစ်နေတယ်ဆိုတာလည်း မသိတဲ့အတွက် ဒီထက်တော့ ပိုမမြင်နိုင်ပါဘူး။ သတင်းတွေကတက်လာတဲ့ အချက်တွေရယ်။ ကိုယ့်ရှေ့မှာ မြင်ရသလောက်ရယ်ကိုပဲကြည့်ပြီး ကောက်ချက်ချနိုင်တယ်။
အခုအချိန်ထိ. အစိုးရအဖွဲ့ထဲမှာ E government အတွက် အစွမ်းကုန် ကြိုးစားမယ့်သူ စိတ်အားထက်သန်သူ မရှိသေးဘူးလို့ပဲမြင်မိတယ်။
အခုအချိန်မှာ ဘာပဲသိချင်ချင် အရင် အင်တာနက်ပေါ် တက်ကြည့်တာပါ။
သတင်း၊လိပ်စာ၊ ဖုန်းနံပါတ်၊ အကြောင်းအရာ… စသဖြင့်ပေါ့
နောင်လည်း ဒီထက်ပိုတက်ကြည့်ကြဦးမှာပါပဲ။
ကိုယ့်ရဲ့ Website တွေဆိုတာလည်း ဧည့်သည့်တွေလာကြည့်လို့ရတဲ့ ဧည့်ခန်းတွေ လိုပါပဲ။ သတင်းအချက်အလက် ပေးနိုင်ရင်ပေးနိုင်သလောက် ကိုယ့်အကြောင့် သူသိလေ။ ဆက်သွယ်စုံစမ်းဖို့လွယ်ကူလေပါပဲ.